Дугиев Магомед
Дугиев Магомед
Деша са дог, деша
Деша са дог, деша,
Ешаш санна байт.
Хьо мел чIоагIа эш,
Безам ба са хайта.
Уллув хилча, сона,
Хала доахалу са.
БIарахьежаш хьона,
Йоаккхаргьяр аз ха.
ЛаьгIле, сихагI лаьгIле,
Хьо са дега гарт.
Са ираз ма човхаде,
ЛаьгIде унзара тата.
Хьажача хьо бIара,
Бицлу дунен бала.
Цхьан хIамах со кхера,
Кхера хьох со вала.
_
Деша са дог, деша,
Ешаш санна байт.
Хьо мел чIоагIа эш,
Безам ба са хайта!
Безам
Ловрг ма я аз цIайза шелал,
Ловргда моллагI лазар аз.
Иштта ловрг ма я аз хьогал,
Хозаш хилча из хьа оаз.
Уллув хьона со ца хилча,
Маьлха дуне хьога-м тац.
Сона уллув хьо ца хилча,
Мишта ваха веза-м хац.
Лорадергда аз хьа вахар,
Лорадергда Iа доаха са.
ХIара дийнахь хьа Iи да со,
Бийсан хургда сох хьа гIа.
Хьаькъалах Iа воаккха, безам..
МоллагI дог хьай доалахь ду.
Амма, хIана оал хьох «безам»?
Лазар да хьо, да хьо у!
Хетаергья аз къайла байташ,
Сай са хьона хетадергда.
Хьо аз зийча – тувлалу уйлаш,
Хьо са аькима моттиг я.
***
Фордан оазага ладувгIa гIорг ма вар со,
Халахетар даь оазаш йицлургьяр.
Дог а сайх даккха йиш яларе,
Дегаьш доацача наха дIалургдар.
ДогIан тIадамаш санна лег дешаш,
ДIаьхача метташа лоацду вахар наьха.
Лаьттал IаьржагIа ма дий керар дегаш…
Мишта мог-хьогI укх дунен тIа ваха?
Лораелахь ха
Дунен чу хьай йоаккха ха,
Дехар да са, лорае...
ДIааьнна дош юхадоагIац,
Хьай багенна доал Iа де...
Йолча хана уллув Нана,
Еза аьле, теркам бе.
Iоажало шо къоастадича,
Дехке чIоагIа варгва хье.
ДоттагIца хьо ийгIа вале,
КъинтIераваьле, кулг Iа ле.
Бусалба ши саг ца товр шоайла,
Да ма йохий доккха къа.
Дунен чу хьай йоаккха ха,
Дех аз хьога, йоа ма е.
МоллагI хIама ахчах эце,
ЙоагIарг ма яц цунах ха.
Хьа цIи
Шийлача михо, лергйухе са кхаьче,
Хьа цIи сона мерза екаю.
Iаьржача бийсан наькъаш сийрдадаьхе,
Седкъаша сигал хьа цIи оттаю.
Массанахьа лех аз хьа бIаргаш,
Иразе бесса хет сона-м уж.
Соцаергьяр аз хьоца йоаха ханаш,
Дуненга со безаме ма хьож.
ХIара Iуйран малхаца хьо къувс,
ЗIанарашца хьо цо хьестандаь.
ХIара сарахь беттаца аз къувс,
Бийса даькъал хьога ювцандаь.
Дунен чу я вайна дукха оазаш,
Хьачул хозах оаз кхы хаза яц.
Хьона са дего мел доаха ловцаш,
ЦIаккъа дагардаь уж варг ма вац.
Хьа еларо бицбу эзар бала,
Безамах хьалдизад Iа са дог.
Хьа тешамо лотабу кер чу ала,
Хьа цIерца боаккх аз хIара ког.
Сих ма ле, са дог
Сих ма ле, са дог, сих ма ле...
Дог доацача сага Iа безам ма ле.
Сих ма ле, са дог, сих ма ле...
Саг воацача сага хьо детта ма ле.
Наькъ тIа водар — воагIачунна,
ДоттагI аьле, цIераш техкаш дац.
Хозача дешашца, дог, хьо Iехаденна,
Хьай илли Iа лекха йиш ма яц.
Тешаме хьа гIала хаьрцай аьнна,
Сих ма ле хьо баккха сардам, бехк.
Хьона вас яь дош, хьерчаш даьна,
Вахаро де доагIар дергда чехк.
ЗIамига дог, цкъа дохадаьр хьо,
Шозза дег чу вита йиш ма яц.
КIеззига мукъагI лоархIачоа хьо,
Човнаш е а хьона могаргдац.
Сих ма ле, са дог, сих ма ле...
Дог доацача сага дуне кхе ма де.
Сих ма ле, са дог, сих ма ле...
Саг воацача сага ха Iа йоа ма е.
Дог цIена хилча
Дог цIена хилча, аттагIа да ваха...
Хьа уйлаш а цIена, паргIата ма я.
Дог цIена хилча, аттагIа садоах...
Пхаьнашкара цIий хьа маьрша да.
Дог цIена хилча, аьттув хьоца баха...
Хьо мархIавелле, ираз хьох хьерч.
Дог цIена хилча, гIа маьрша Iа боах...
Малейкаша хьо лораву во деча.
Дог цIена хилча, дег чура малх хьеж...
Цу сердало хьа наькъаш даькъал ду.
Дог цIена хилча… Цул хозагIа фу хургда?
Эггара вIаьхе тIаккха цо хьо ву.
Дог цIена хилча, аттагIа да ваха...
Дика оагIув лаьцача нийсагIа хургда.
Дог цIена хилча, аттагIа да садаха...
Хьа дикал хьона духьалйоагIаргья.
Вувцалахь
Дегаь аттагIа хуле вийцача,
Вувца дог Iаббалца оаш.
ХIаьта, дехар да са, дийцар
(Диц ма ле) дужалга каша.
ПаргIатдовргдале а вийцача,
Вувца, кIордадалцца, оаш,
ЛадийгIачо, къайла даьлча,
Сога дувцалг халаш шоаш.
Хала хет ма мотта вийцача,
ЙIайха-шийла хетац сона.
Теша, моллагIча воча дешо,
ЙIовхал кхоана лургья шоана.
Цхьабола наха, ва из йоахар,
Садоаха а фо санна да.
Маьрша хилда из шун вахар,
Дукха воахаволва со шоана.
Дегаь товр а хуле вийцача,
Вувца, дог Iаббалца оаш.
ХIаьта дехар да са, вийцача
Са наькъаш а дицде оаш.